បុគ្គល ធាន វុទ្ធី ចូលបំភ្លឺករណីតាំងខ្លួនជាព្រះសិរអារ្យមេត្រី នៅចំពោះមុខអភិបាលខេត្តកណ្តាល (រូបថតពី៖ ហ្វេសប៊ុកក្រសួងធម្មការ និងសាសនា)
បុគ្គល ធាន វុទ្ធី ដែលតាំងខ្លួនជាព្រះសិរអារ្យមេត្រី នៅវត្តទួលរាជា ខេត្តកណ្តាល នៅព្រឹកថ្ងៃពុធនេះ ព្រមចូលខ្លួនបំភ្លឺ បន្ទាប់ពីមានលិខិតអញ្ជើញជាផ្លូវការរបស់អភិបាលខេត្តកណ្កាល។
អភិបាលខេត្តកណ្តាលលោក ផៃ ប៊ុនឈឿន ប្រាប់ VOD នៅថ្ងៃទី ៦ ខែ សីហានេះថា លោក ធាន វុទ្ធី បានចូលបំភ្លឺនៅម៉ោង ៨ និង៣០នាទី ព្រឹកថ្ងៃពុធនេះ តាមការកោះអញ្ជើញរបស់លោក។ លោកបន្តថា ក្នុងអំឡុងពេលសាកសួរ លោក ធាន វុទ្ធី ព្រមទទួលទោសកំហុសរបស់ខ្លួនទាំងអស់ដែលខ្លួនបានប្រព្រឹត្តិកន្លងមក និងចូលខ្លួនទទួលការអប់រំ និងការណែនាំពីសម្តេចសង្ឃ។ លោក បន្តថា នៅព្រឹកមិញនេះ លោកបាននាំខ្លួនបុគ្គលនេះ ទៅសុំខមាលទោសចំពោះព្រះភ័ក្រសម្ដេចពោធិ៍វាំង អំ លឹមហេង នៅវត្តចំពុះក្អែក ដើម្បីទទួលការអប់រំពីវិន័យព្រះពុទ្ធសាសនា និងការអប់រំពីសម្ដេចសង្ឃ។ លោកបន្ថែមថា បុគ្គល ធាន វិទ្ធី នឹងចូលបំភ្លឺនៅក្រសួងធម្មការ និងសាសនា នៅថ្ងៃស្អែក ហើយក្រសួងមានចំណាត់ការយ៉ាងណានោះ លោកមិនទាន់ដឹងទេ។
ការចូលខ្លួននេះ បន្ទាប់ពីប្រមុខរដ្ឋាភិបាលកម្ពុជា កាលពីថ្ងៃចន្ទ បញ្ជាឲ្យរដ្ឋមន្ត្រីក្រសួងធម្មការ និងសាសនា ចាត់វិធានការម៉ឺងម៉ាត់លើបុគ្គល ធាន វុទ្ធី ដែលបានតាំងខ្លួនជាព្រះសិរអារ្យមេត្រី ប្រមាថលើព្រះពុទ្ធសាសនា ដោយការបោកប្រាស់ប្រជាពលរដ្ឋខ្មែរ និងបង្ខំឲ្យព្រះសង្ឃថ្វាយបង្គំខ្លួន។
បើតាមប្រជាពលរដ្ឋរស់នៅក្នុង ឃុំពោធិ៍បាន ស្រុកកោះធំ ខេត្តកណ្ដាល អះអាងថា បុគ្គល ធាន វុទ្ធី ដែលតាំងខ្លួនធ្វើជាព្រះស័ក្កិសិទ្ធ និងជាព្រះសិរអារ្យមេត្រី ដោយបង្ខំឲ្យព្រះសង្ឃជាច្រើនអង្គ ថ្វាយបង្គំនោះ បច្ចុប្បន្ននេះមានប្រពន្ធ កូន និងមានផ្ទះជាច្រើនកន្លែង ដូចជា ផ្ទះល្វែងនៅផ្សារតាខ្មៅថ្មី ផ្ទះនៅស្រុកស្អាង ខេត្តកណ្តាល បុរីចំការមន រាជធានីភ្នំពេញ និងខេត្តតាកែវជាដើម៕