ពួកអ្នកដំណើររាប់សិបនាក់ បាននាំគ្នារុញរថភ្លើងមួយខ្សែឲ្យផ្អៀងទៅម្ខាងដើម្បីសង្គ្រោះអ្នកដំណើរបុរសម្នាក់ដែលជើងម្ខាងរបស់គាត់បានជាប់នៅចន្លោះទូររថភ្លើងនិងកន្លែងអ្នកដំណើរឡើងចុះ ។ ហេតុការណ៍នេះ បានកើតឡើងក្នុងអំឡុងពេលមានអ្នកដំណើរច្រើន នៅទីក្រុងPerth ប្រទេសអូស្ត្រាលី ភាគខាលិច កាលពីព្រឹកថ្ងៃពុធ ។
បុរសនេះ បានកំពុងដើរឡើងជិះរថភ្លើងនៅស្ថានីយមួយនៅទីក្រុងនេះ ស្រាប់តែគាត់បានរអិលជើងធ្លាក់ចូលប្រឡោះតូចមួយនៅចន្លោះទូររថភ្លើងនិងកន្លែងអ្នកដំណើរឡើងចុះ។ នៅពេលភ្លាមនោះ រថយន្តពេទ្យនិងក្រុមអ្នកសង្គ្រោះ ត្រូវបានហៅមក ប៉ុន្តែបុរសនេះត្រូវបានសង្គ្រោះដោយគ្មានរបួសស្នាមបន្ទាប់ពីពួកអ្នកដំណើរនិងបុគ្គលិករថភ្លើងនេះ បាន នាំគ្នារុញរថភ្លើងឲ្យផ្អៀងទៅម្ខាងដើម្បីអាចទាញជើងរបស់បុរសនេះចេញបាន នៅមុនពេលក្រុមអ្នកសង្គ្រោះបានមកដល់នោះ។
ក្រុមអាជ្ញាធរបានថ្លែងសរសើរចំពោះការខំប្រឹងប្រែងរបស់ពួកគេទាំងនោះ ដោយហៅការខំរុញច្រានរថភ្លើងឲ្យទ្រេតទៅម្ខាងបានបែបនេះថាជា“កម្លាំងប្រជាជនពិតៗដ៏អស្ចារ្យ”។