សកម្មភាពត្រួតពិនិត្យ និងដកហូតសំណៅឯកសារ ទូរស័ព្ទ និងឧបករណ៍ហាមឃាត់នៅមុខមណ្ឌលប្រឡង (រូបភាពពីហ្វេសប៊ុកក្រសួងអប់រំ)
អ្នកនាំពាក្យក្រសួងអប់រំចាត់ទុកថាស្ថានភាពនៃការប្រឡងមធ្យមសិក្សាទុតិយភូមិក្នុងឆ្នាំនេះ មានភាពល្អប្រសើរជាងឆ្នាំមុនៗ និងមានភាពមិនប្រក្រតីតិចតួច ដោយសារក្រសួងផ្សព្វផ្សាយពីវិធានការហាមឃាត់បានទូលាយ និងមានការសហការល្អពីគ្រប់ភាគីពាក់ព័ន្ធ ។
អ្នកនាំពាក្យក្រសួងអប់រំ យុវជន និងកីឡាលោក រស់ សាលីន ប្រាប់ VOD នៅព្រឹកថ្ងៃពុធនេះថា បើតាមលោកសង្កេតមើលការប្រឡងមធ្យមសិក្សាទុតិយភូមិក្នុងឆ្នាំនេះទៅនឹងការប្រឡងឆ្នាំមុនៗឃើញថា ឆ្នាំនេះមានភាពល្អប្រសើរជាង។ លោកថា ដោយសារមានការផ្សព្វផ្សាយទូលំទូលាយពីក្រសួងនូវរាល់ការហាមឃាត់ផ្សេងៗពាក់ព័ន្ធនឹងការប្រឡង ព្រមទាំងមានការសហការល្អពីបណ្តាអង្គភាពប្រឆាំងអំពើពុករលួយ ក៏ដូចជាសង្គមស៊ីវិលដែលពាក់ព័ន្ធនានាផងនោះ ទើបបេក្ខជនប្រឡងមិនហ៊ានធ្វើខុសវិន័យ។
លោក រស់ សាលីន បន្ថែមថា ភាពមិនប្រក្រតីដែលក្រសួងចាប់បានគឺការជួលឲ្យប្រឡងជំនួស២នាក់ នៅខេត្តកណ្តាល និង២នាក់ផ្សេងទៀតនៅខេត្តស្វាយរៀង និងម្នាក់ទៀតពាក់ព័ន្ធនឹងការប្រើហិង្សាលើអ្នកអង្កេតការណ៍របស់អង្គភាពប្រឆាំងអំពើពុករលួយ។ លោកថា យុវជនទាំង៥នាក់នោះត្រូវបានក្រសួងលុបឈ្មោះចេញពីការប្រឡង ចំណែកចំណាត់ការបន្តទៀតគឺសម្រេចលើអាជ្ញាធរមានសមត្ថកិច្ចថានឹងត្រូវធ្វើបែបណាជាបន្ត។
ដោយឡែកសម្រាប់ចំនួនអ្នកដែលមានបញ្ហាសុខភាពក្នុងពេលប្រឡង លោកមិនទាន់ទទួលបានរបាយការណ៍ច្បាស់លាស់នៅឡើយទេ។
បណ្តាសិស្សដែលជាបេក្ខជនប្រឡងត្អូញត្អែរថា ក្រសួងគួរតែបង្កើនគុណភាព ក៏ដូចជាស្តង់ដារអប់រំឲ្យបានខ្ពស់ជាមុនសិន ហើយធ្វើការរឹតបន្តឹងតាមដំណាក់កាល។ ពួកគេភាគច្រើនបារម្ភថា ការរឹតបន្តឹងការប្រឡងដោយគំហុកបែបនេះ អាចនឹងធ្វើឲ្យអត្រានៃសិស្សដែលប្រឡងធ្លាក់មានចំនួនច្រើន។
ពាក់ព័ន្ធនឹងការប្រឡងនេះដែរ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន មានប្រសាសន៍កាលពីល្ងាចថ្ងៃទី៤ ខែសីហា ក្នុងពិធីអបអរនិស្សិតជាប់អាហារូបករណ៍ទៅសិក្សានៅប្រទេសបារាំងថា ដំណើរការនៃការប្រឡងមានភាពល្អប្រសើរគួរឲ្យកត់សម្គាល់។ លោកថា ចំពោះការលើកឡើងថាមានការរឹតបន្តឹងជ្រុលហួសហេតុនោះ មិនមែនជាការរឹតបន្តឹងទេ តែក្រសួងធ្វើនេះដើម្បីឲ្យការប្រឡងមានភាពត្រឹមត្រូវ និងពង្រឹងសមត្ថភាពដល់សិស្សប៉ុណ្ណោះ។
ចំណែកប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន មានប្រសាសន៍កាលពីថ្ងៃអង្គារ ម្សិលមិញពាក់ព័ន្ធនឹងដំណើរការនៃការប្រឡងថា មានភាពល្អប្រសើរជាងឆ្នាំមុនៗ តែលោកគ្រូ អ្នកគ្រូដែលជាអនុរក្សហាក់មិនសប្បាយចិត្តនឹងការអនុវត្តហួសដែនសមត្ថកិច្ចរបស់អ្នកអង្កេតការណ៍អង្គភាពប្រឆាំងអំពើពុករលួយ។
VOD មិនអាចសុំការអធិប្បាយពីប្រធានអង្គភាពប្រឆាំងអំពើពុករលួយ លោក ឱម យិនទៀង និងអ្នកនាំពាក្យ លោក កែវ រ៉េមី បានទេ ដោយទូរស័ព្ទចូលតែគ្មានអ្នកទទួល ។
តាមការសង្កេតមើលរបស់អង្គការសង្គមស៊ីវិលនាឆ្នាំកន្លងមកឃើញថា មានការយកចូលនូវសំណៅឯកសារក្នុងបន្ទប់ប្រឡង ក៏ដូចជាការប្រើប្រាស់ទូរស័ព្ទក្នុងពេលប្រឡង ការសូកប៉ាន់អនុរក្សជាថ្នូរនឹងការបើកចម្លងជាដើម បើទោះជាមានការចេញវិធានការហាមឃាត់មុនពីក្រសួងក៏ដោយ។ យ៉ាងណាមិញ រដ្ឋមន្ត្រីក្រសួងអប់រំប្រកាសធ្វើកំណែរទម្រង់ប្រព័ន្ធអប់រំ ដោយចាប់ផ្ដើមពីការរឹតន្តឹងការប្រឡងបាក់ឌុប និងអនុញ្ញាតឲ្យមានការចូលរួមពីអង្គភាពប្រឆាំងអំពើពុករលួយ តាមរយៈការបង្កើតអ្នកស្ម័គ្រចិត្តអង្កេតការណ៍ឃ្លាំមើលក្នុងពេលប្រឡងតាមមណ្ឌលនីមួយៗផងដែរ៕