ភ្នំពេញ: សមត្ថកិច្ចប៉ុស្តិ៍ផ្សារដេប៉ូ២ឃាត់ជនសង្ស័យពីរនាក់ដោយសារមានគ្រឿងញៀនជាប់ខ្លួន កាលពីម៉ោងជាង១០យប់ ថ្ងៃទី២ ខែសីហា ឆ្នាំ២០១៤ នៅចំណុចភ្លើងស្តុបសន្ធរម៉ុក ផ្លូវលេខ២៤៥ កែងផ្លូវលេខ១២៨ ស្ថិតក្នុងសង្កាត់ផ្សារដេប៉ូទី២ ខណ្ឌទួលគោក។
សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនខាងលើទី១.ឈ្មោះចាយ សំអាត ហៅអាត អាយុ២៥ឆ្នាំ មុខរបរបោះពុម្ពលើអាវយឺត ស្នាក់នៅផ្ទះលេខ០៧៧ ផ្លូវលំ ភូមិភ្នាត សង្កាត់ស្ទឹងមានជ័យ ខណ្ឌមានជ័យ។ ជនសង្ស័យទី២.ឈ្មោះ ហ៊ួន ធូ ហៅនឹម ធូ អាយុ២៩ឆ្នាំ មុខរបររត់ម៉ូតូឌុប ស្នាក់នៅភូមិប្រ៉ក់ក្តារ ឃុំឧត្តុង្គ ស្រុកឧត្តុង្គ ខេត្តកំពង់ស្ពឺ។
ប៉ូលិសបន្តថា វត្ថុតាងដកហូតពីជនសង្ស័យរួមមាន ក្រាមពណ៌សថ្លា (សង្ស័យជាគ្រឿងញៀនម៉ាទឹកកក) ចំនួន៧កញ្ចប់ធំ មានតូចមួយកញ្ចប់ ម៉ូតូមួយគ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៤ គ្មានស្លាកលេខ ក្រដាសផ្លេកមួយបន្ទះ ទូរស័ព្ទ៣គ្រឿង។
សមត្ថកិច្ចបានឲ្យដឹងដែរថា មុនពេលឃាត់ខ្លួនជនសង្ស័យទាំងពីរនាក់ខាងលើ កំលាំងនគរបាលប៉ុស្តិ៍ផ្សារដេប៉ូទី២ បានល្បាតការពារសុវត្ថិភាពនៅក្នុងមូលដ្ឋាន ក៏ប្រទះឃើញជនសង្ស័យ០២នាក់ខាងលើ បើកម៉ូតូគ្មានស្លាកលេខ ភ្លាមនោះកំលាំងយើងបានឃាត់ដើម្បីត្រួតពិនិត្យ តែជនសង្ស័យបានព្យាយាមបើកម៉ូតូគេចខ្លួន ក៏ត្រូវសមត្ថកិច្ចដេញឃាត់បានត្រួតពិនិត្យឃើញមានគ្រឿងញៀនក៏ឃាត់ខ្លួនតែម្តង។ បច្ចុប្បន្នជនសង្ស័យទាំងពីរនាក់កំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមផ្លូវច្បាប់៕