ក្រុងសៀមរាបអង្គរ នៃខេត្តសៀមរាបបានជាប់ចំណាត់ថ្នាក់គឺជាទីក្រុង«គោលដៅចម្បងទី៤សម្រាប់ភ្ញៀវទេសចរទូទាំងពិភពលោកដែលចូលចិត្តមកកម្សាន្ត»ក្រោយពេលដែលការស្ទង់មតិមួយត្រូវបានគេធ្វើឡើងកាលពីពេលកន្លងទៅថ្មីៗនេះក្នុងឆ្នាំ២០១៤ ខណៈពេលរាជធានីប្រទេសថៃបានធ្លាក់ចេញពីបញ្ជីឈ្មោះទីក្រុងទាំង១០ដែលមានចំនួនភ្ញៀវទេសចរណ៍ចូលចិត្តទៅកម្សាន្តជាងគេនោះ។ សម្រាប់ទីក្រុងទាំង១០ដែលភ្ញៀវទេសចរចូលចិត្តទៅកម្សាន្តនោះរួមមាន ទី១ Kyoto.Japan ទី២ Charleston,Southcorolina ទី៣ Florence ទី៤ «Siem Reap,Cambodia ទី៥ Rome ទី៦ Istanbut ទី៧ Seville,Span ទី៨ Barcelona ទី៩ Mexisco City ទី ១០ Neworleans។
លោក ង៉ូវ សេង កាក់ ប្រធានមន្ទីរទេសចរខេត្តសៀមរាប បានឲ្យដឹងតាមទូរស័ព្ទនៅរសៀលថ្ងៃនេះផងដែរថា ក្នុងរយៈពេល៦ខែ ដើមឆ្នាំ២០១៤នេះមានចំនួនទេសចរណ៍អន្តរជាតិចូលមកកម្សាន្តនៅខេត្តសៀមរាបចំនួន 1239544 នាក់ កើនឡើង10,45% បើប្រៀបធៀបរយៈពេលដូចគ្នាកាលពីឆ្នាំ២០១៣កន្លងមក រីឯភ្ញៀវទេសចរណ៍ជាតិមានចំនួន1345598នាក់កើនឡើង33,17%បើប្រៀបធៀបរយៈពេលដូចគ្នាកាលពីឆ្នាំ២០១៣កន្លងមកដូចគ្នានេះផងដែរ ហើយអ្វីដែលគួរឲ្យកត់សំគាល់នោះគឺឃើញថាចំនួនភ្ញៀវទេសចរណ៍ជាតិ និងអន្តរជាតិដែលមកទស្សនាទីនេះនៅតែបន្តកើនឡើង។ ខេត្តសៀមរាបក៏បានរៀបចំខ្លួនរួចរាល់សម្រាប់ការទទួលនៃលំហូរចូលរបស់ភ្ញៀវទេសចរណ៍នេះ ដូចជាសណ្ឋាគារ ផ្ទះសំណាក់សេវាកម្មផ្សេងៗទៀតនោះ។
បើយោងតាមឯកសាររបស់សាលាខេត្តក៏ដូចជាអង្គការសង្គមស៊ីវិលដែលបម្រើការងារនៅក្នុងខេត្តសៀមរាបនេះដែរ បានផ្ដល់ឲ្យអ្នកព័ត៌មានយើងបានដឹងថា នៅទូទាំងខេត្តសៀមរាបទាំងមូល មានអត្រាប្រជាជនសរុប ប្រហែលជិត ១ លាន នាក់ គឺ ៩២០ ១២៣ នាក់ ក្នុងនោះ អ្នកដែលរស់នៅក្នុងទីប្រជុំជនក្រុងសៀមរាបនេះមានចំនួន ១៩៧ ៣០១ នាក់។ ខេត្តសៀមរាបទាំងមូលមានផ្ទៃក្រឡា ១០ ២៩៩( គីឡូម៉ែត្រ2 Km2)មានក្រុងចំនួន១ និងស្រុកចំនួន១១ ឃុំចំនួន ៨៧ សង្កាត់ចំនួន១៣ នឹង ភូមិ ចំនួន ៨៧៥ (ព័តមានរបស់ក្រសួងទេសចរណ៍នាដើមឆ្នាំ២០១៣)។ប្រជាជនដែលកំពុងតែរស់នៅក្រុងសៀមរាបភាគច្រើនគឺ ជា អ្នកផ្លាស់ទី(អ្នកចំណូល)មកពីកន្លែងផ្សេងៗនៃប្រទេសកម្ពុជាតួយ៉ាង អ្នក ភ្នំពេញ ខេត្តកណ្ដាល កំពង់ចាប បន្ទាយមានជ័យ បាត់ដំបង និងខេត្តពោធិ៍សាត់ ជាដើម ហើយភាគច្រើនពួកគេគឺជា និស្សិតដែលទើបបញ្ចប់ មហាវិទ្យាល័យ ក៏ដូចជាក្រុមអ្នកជំនួញទាំងឡាយ បាន នាំគ្នា«មកតាំងទីលំនៅ ទីក្រុងនេះដើម្បីប្រកបការងារនិងប្រកបមុខរបរជំនួញផ្សេងៗ»ខណះដែលអ្នកដើមកំនើតនៅក្រុងសៀមរាបពិតប្រាកដភាគច្រើនពួកគេបានផ្លាស់ទីលំនៅ ទៅរស់នៅតាមជនបទ និងតំបន់ដាច់ស្រយាលនៅក្នុងខេត្តសៀមរាបមូលហេតុដោយសារតែ«បញ្ហាជីវភាព» និងការអប់រំនៅមានកម្រិតទាប។ ក្រុងសៀមរាបគឺជាគោលដៅចម្បងរបស់ភ្ញៀវទេសចរណ៍ ជាហេតុទើបបានជានៅតាមផ្លូវសំខាន់នានានៅទីក្រុងនេះសំបូរទៅដោយសំណង់អាគារថ្មីៗជាច្រើនដូចជា សណ្ឋាគារ ភោជនីយដ្ឋាន ហាង ម៉ាស្សា ខារ៉ាអូខេ ហាងលក់ទំនិញ និងអាគារផ្ទះល្វែងថ្មីៗជាដើម ហើយភាគច្រើនឈ្មោះសណ្ឋាគារ និងហាងទំនិញនានា ច្រើនតែបានដាក់ភ្ជាប់ជាមួយនឹងពាក្យ «អង្គរ» ដែលវាជាការបញ្ជាក់នូវ «អត្តសញ្ញាណនៃទីក្រុងបូរាណមួយនេះ»! ហើយទីប្រជុំជនសំខាន់ៗដែលសំបូរទៅដោយភ្ញៀវទេសចរណ៍ទូទៅទាំងជាតិ និងអន្តរជាតិ ដែលចូលចិត្តទៅកម្សាន្ត ក្រោយពេល ដែលបានទស្សនា ប្រាង្គប្រាសាទនានារួចហើយនោះ គឺ ម្ដុំផ្សារចាស់ឬហៅថា Pup Street ដែលទីនោះសំបូរទៅដោយផ្សារ និងហាងតូចធំ សម្រាប់លក់ វត្ថុអនុស្សាវរីយ៍ និងភេសជ្ជៈគ្រប់ប្រភេទ។ វាក៏ជាកន្លែងកម្សាន្តនាពេលរាត្រី សម្រាប់ភ្ញៀវទេសចរណ៍បរទេសផងដែរ ហើយទីនោះត្រូវបានគេចាប់ផ្ដើមដំណើរការពីម៉ោង ៦ព្រឹក រហូតដល់ ២១យប់ ហើយភាគច្រើនពេលដែលក្រុមភ្ញៀវទេសចរមកកាន់ទីនេះវិញគឺពីម៉ោង៥ល្ងាចរហូតដល់ម៉ោង៤ឬ៥ភ្លឺទើបអស់ភ្ញៀវទេសចរណ៍។
សម្រាប់ខេត្តសៀមរាបមួយនេះគឺជាគោលដៅចម្បង របស់ភ្ញៀវទេសចរណ៍ ទូទាំងពិភពលោក ហើយក៏ជាតំបន់មួយដែលសំបូរទៅដោយសំណង់ប្រាសាទតូចធំជាច្រើន ដែលជាទីស្ថានរបស់ពពួកអាទិទេព ទាំងឡាយទាំងពួងផងដែរ។ នៅពេលដែលភ្ញៀវទេសចរណ៍ទូទាំងពិភពលោកបានធ្វើដំណើរកម្សាន្តមកកាន់ប្រទេសកម្ពុជា«ដែលជារាជាណាចក្រអច្ឆរិយ»នេះគឺពួកគេមិនដែលខកខាន មកទស្សនាតំបន់«សៀមរាបអង្គរនេះបាននោះឡើយ»! នៅក្នុងនោះរួមមាន
ទាំងខ្លួនលោកអ្នក ផ្ទាល់ផងដែរ មិនថា អីចឹង? វាជា ការពិតណាស់ថា« ទឹកដីនៃខេត្តសៀមរាបនឹងមិនធ្វើឲ្យក្ដីស្រមៃរបស់អស់លោកខកបំណងឡើយ»៕
