ភ្នំពេញ: ស្ត្រីម្នាក់បានស្លាប់ ភ្លាមៗនៅនឹងកន្លែង បន្ទាប់ពីត្រូវខ្មាន់កាំភ្លើង ២នាក់ ជិះម៉ូតូមួយគ្រឿង ធ្វើសកម្មភាពបាញ់ប្រហារ ចំនួន៤គ្រាប់ ខណៈស្ត្រីរងគ្រោះ កំពុងជិះម៉ូតូឌុបម្តាយ។ ករណីនេះ បានកើតឡើងកាលពីម៉ោងប្រមាណជា ៩ ព្រឹក ថ្ងៃទី៦ ខែសីហា ឆ្នាំ២០១៤ ស្ថិតនៅចំណុចផ្លូវបេតុង ច្រកចូលវត្តអង្គតាមិញ ផ្លូវ២០០៤ ភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ។
បន្ទាប់ពីបាញ់ប្រហារ ក្រុមជនល្មើស បានជិះម៉ូតូស៊េរីទំនើប គេចខ្លួនបាត់ទៅ។ ភ្លាមនោះ សមត្ថកិច្ចបានទៅដល់ ហើយសន្និដ្ឋានជំហានដំបូងថា ការបាញ់ប្រហារនេះ មិនមែនជាករណីប្លន់ និងបានដាក់ការសង្ស័យថា ជារឿងស្នេហាត្រីកោណទៅវិញ ។
សមត្ថកិច្ច បានឲ្យដឹងទៀតថា ស្ត្រីរងគ្រោះ ឈ្មោះ គឹម សុជាតា អាយុ ៣៦ ឆ្នាំ មានស្វាមី ឈ្មោះ ណូ ជាអ្នកជំនួញឈើប្រណីតនៅខេត្តរតនគិរី។ មុនពេលកើតហេតុ ស្ត្រីរងគ្រោះ បានជិះម៉ូតូ អាយខន ពណ៌ត្រួយចេក ពាក់ស្លាកលេខភ្នំពេញ 1X-4366 មានលំនៅដ្ឋាន តាមបណ្តោយផ្លូវកម្ពុជាក្រោម សង្កាត់មិត្តភាព ខណ្ឌ៧មករា។
ប្រភពដដែល បានឲ្យដឹងទៀតថា នៅមុនពេលកើតហេតុ ស្ត្រីរងគ្រោះ បានជិះម៉ូតូឌុបម្តាយ ចេញពីផ្ទះ ទៅលេងផ្ទះបង នៅម្តុំរោងចក្រ៦ជាន់។ លុះដល់ចំណុចកើតហេតុ ស្រាប់តែជនសង្ស័យ មានគ្នា២នាក់ ជិះម៉ូតូស៊េរីទំនើប មកទន្ទឹមជាមួយម៉ូតូស្ត្រីរងគ្រោះ ដោយមិនមានមាត់កអ្វីទាំងអស់ ហើយបាញ់ប្រហារ ទៅលើនារីម្នាក់នេះ ចំនួន៤គ្រាប់ (ចំក្បាល ខ្លួន ដៃ និងភ្លៅ) បណ្តាលឲ្យស្លាប់ភ្លាមៗ នៅនឹងកន្លែង។
ចំណែកសពត្រូវបានក្រុមគ្រួសារ ហៅរថយន្តសាមុយ ដឹកយកទៅកាន់លំនៅដ្ឋាន ដើម្បីរៀបចំធ្វើបុណ្យ។ នៅពេលនេះ កម្លាំងសមត្ថកិច្ច បានកំពុងតែស៊ើបអង្កេតលើករណីនេះ ដើម្បីស្រាវជ្រាវ តាមចាប់ជនសង្ស័យ យកមកផ្តន្ទាទោសតាមច្បាប់៕