ព្រះសីហនុ: ស្ត្រីវ័យ៣២ឆ្នាំម្នាក់ មានរបរលក់ដូរ សម្លៀកបំពាក់ នៅក្នុងទីផ្សារទំនប់រលក ស្រុកស្ទឹងហាវ បានស្លាប់ដោយមាន ស្នាមចាក់បំពង់ក ដោយកូនកាំបិត ចំនួនពីរកាំបិត។ ស្ត្រីរងគ្រោះនេះ ឈ្មោះ វង្ស វណ្ណរតនា បានស្លាប់នៅ ក្នុងផ្ទះរបស់ខ្លួន ស្ថិតក្នុងភូមិទំនប់រលក ឃុំទំនប់រលក ស្រុកស្ទឹងហាវ ខេត្តព្រះសីហនុ កាលពីម៉ោងជាង ៥ ល្ងាចថ្ងៃទី៦ ខែសីហា ឆ្នាំ២០១៤ ។
ករណីនេះ ប៉ូលិសបានសន្និដ្ឋានថា ជាអំពើអត្តឃាត។ ក៏ប៉ុន្តែអ្នកជិតខាងដាក់ បន្ទុកសង្ស័យថា មិនមែនជាអត្តឃាត ដោយខ្លួនឯងនោះទេ។ ប្រជាពលរដ្ឋ រស់នៅជិតខាងស្ត្រីរងគ្រោះ បានលើកឡើងពី ហេតុផលមួយថា មនុស្សយើង មិនអាចចាក់សម្លាប់ខ្លួនឯង បានពីរកាំបិតនោះទេ។ ស្រី្តរូបនេះ មិនមែនជាជនក្រីក្រនោះទេ។ ម្យ៉ាងវិញទៀត ស្រី្តរូបនេះ មានប្តីជាមន្ត្រីប៉ូលិស ប៉ុស្តិ៍រដ្ឋបាល ទើបបែកបាក់គ្នាផងដែរ។
ពលរដ្ឋនៅជិតខាង បាននិយាយថា ជនរងគ្រោះ ពុំមានកូនទេ គឺរស់នៅជាមួយ ប្អូនស្រីម្នាក់ និងជីតាម្នាក់ ពុំមានអ្នក ក្រៅនោះទេ ហើយបន្ទាប់ពីហេតុការណ៍នេះ គ្រួសារស្ត្រីរងគ្រោះ បានអះអាងថា មិនមានបាត់ ទ្រព្យសម្បត្តិអ្វីទេ៕