ភ្នំពេញ: ក្រុមហ៊ុនផលិតរថយន្ត មហាទំនើបកំពូល របស់ពិភពលោក នៅថ្ងៃនេះ ប្រកាសបង្កើតរថយន្ត Rolls- Royce ម៉ូដែលថ្មីផ្សេងមួយទៀត។ រថយន្តម៉ូដែលថ្មីនោះ នឹងចេញលក់ នៅលើទីផ្សារ នៅពាក់កណ្ដាលឆ្នាំ ២០១៦ ខាងមុខនេះ។
រថយន្តម៉ូដែលថ្មី នឹងត្រូវបង្កើតឡើង ផ្អែកលើជោគជ័យ របស់ម៉ូដែល ដែលមានស្រាប់គឺ ម៉ូដែល Phantom, ម៉ូដែល Ghost និងម៉ូដែល Wraith ដោយបន្តពង្រឹងអនាគត ឲ្យកាន់តែរឹងមាំ សម្រាប់រថយន្តម៉ាក Rolls-Royce ដោយមានការច្នៃរចនា ឲ្យទំនើបទាន់សម័យ សមសួន និងទាក់ទាញ។
រថយន្តម៉ូដែលនេះ ជាប្រភេទរថយន្ត បើកដំបូល ហើយផ្ដល់នូវការបើកបរ យ៉ាងងាយស្រួល ដោយមិនចាំបាច់ប្រឹង តាមរយៈការផ្សំបញ្ចូលគ្នា នូវភាពទំនើប រចនាបថ និងភាពស្រស់ឆើតឆាយ របស់រថយន្ត Rolls-Royce ដ៏ទាន់ សម័យ ជាមួយនឹងបទពិសោធន៍ នៃការបើកបរដ៏ជក់ចិត្ត និងប្រកបដោយក្តីរំភើប។
អគ្គនាយកប្រតិបត្តិ ក្រុមហ៊ុន Rolls-Royce Motor Cars លោក Torsten Miller-Ötvös បានថ្លែងពីរោងចក្រផលិតរថយន្ត Rolls-Royce នៅឯ Goodwood, West Sussex ថា៖ “ខ្ញុំពិតជាមានអារម្មណ៍ រីករាយក្រៃលែង ហើយសូមប្រកាស នៅថ្ងៃនេះ អំពីការផលិតរថយន្ត ម៉ូដែលថ្មីមួយទៀត របស់ក្រុមហ៊ុនយើងខ្ញុំ ដែលជាការបើកនូវទំព័រថ្មី ដ៏អស្ចារ្យរបស់ក្រុមហ៊ុន Rolls-Royce Motor Cars ។
បច្ចុប្បន្ននេះ យើងកំពុងតែផលិតនូវ កំពូលរថយន្តបើកដំបូល សម្រាប់ការបើកបរ កម្សាន្តដ៏ទំនើប និងទាន់សម័យបំផុត ដែលនឹងណែនាំដល់សុភាពបុរស និងសុភាពនារី ដែលមានសុភវិនិច្ឆ័យខ្ពស់ ឲ្យក្លាយជាម្ចាស់លើរថយន្ត Rolls-Royce នេះ” ។
ប្រធានក្រុមហ៊ុន Rolls-Royce Motor Cars លោក Peter Schwarzenbauer បានស្វាគមន៍ចំពោះ ការប្រកាសពីការផលិត រថយន្តម៉ូដែលថ្មីនេះ។ លោកបាននិយាយថា៖ “ការប្រកាសពីការផលិត រថយន្ត Rolls-Royce ម៉ូដែលថ្មី គឺជាព្រឹត្តិការណ៍ដ៏សំខាន់ នៅក្នុងឧស្សាហកម្មរថយន្ត”។
នៅពេលបង្ហាញខ្លួន នៅលើទីផ្សារក្នុងឆ្នាំ ២០១៦ រថយន្ត Rolls-Royce ម៉ូដែលថ្មីដ៏ស្រស់ឆើតឆាយ និងទាក់ទាញនេះ នឹងផលិតឡើងដោយផ្អែក លើជោគជ័យរបស់ម៉ូដែល បច្ចុប្បន្ន ហើយនឹងដើរតួនាទី មួយផ្នែកដ៏សំខាន់ ក្នុងការជួយបំពេញនូវ ការប្ដេជ្ញាចិត្តរបស់ក្រុមហ៊ុន Rolls-Royce Motor Cars សម្រេចឲ្យបាននូវកំណើន ប្រកបដោយនិរន្តរភាព រយៈពេលវែង។
បច្ចុប្បន្ននេះ រថយន្ត Rolls-Royce ម៉ូដែលថ្មី កំពុងតែឆ្លងកាត់ដំណើរការ ធ្វើតេស្តសាកល្បងជាបឋម ខណៈដែលរថយន្តនេះ ឈានចូលដល់ដំណាក់កាលបន្ទាប់ នៃការផលិត៕