ភ្នំពេញ: តារាភាពយន្តល្បីឈ្មោះចាស់វស្សាលោក ទេព រិន្ទដារ៉ូ និងលោក សុះ ម៉ាច ប្រធានសមាគមសិល្បករខ្មែរ និងជាតារាចម្រៀងមួយរូបបានបង្ហាញនូវមោទនភាពខ្ពស់ ចំពោះវិស័យខ្សែភាពយន្តខ្មែរនៅពេលដែលរោងកុនលំដាប់អន្តរជាតិ បង្ហាញវត្តមានជាបន្តបន្ទាប់។
តារាល្បីឈ្មោះក្នុងសង្គមសិល្បៈទាំងពីររូបនេះ បានសម្តែងនូវក្តីរំពឹងទុកថា វិស័យសិល្បៈភាពយន្តខ្មែរ នឹងបោះ ជំហានទៅមុខយ៉ាងឆាប់រហ័ស ខណៈពេលដែលមានវត្តមានរោងភាពយន្តទំនើបថ្មីៗ រួមទាំងការវិនិយោគលើវិស័យមួយនេះ ក៏ផុសផុលផងដែរនៅលើទឹកដីអច្ឆរិយៈ។
ការលើកឡើងបែបនេះរបស់លោក ទេព រិន្ទដារ៉ូ និងលោក សុះ ម៉ាច ធ្វើឡើងក្នុងឱកាសចូលរួមក្នុងពិធីសម្ពោធដាក់អោយប្រើប្រាស់នូវរោងភាពយន្តលំដាប់អន្តរជាតិ Major Cineplex ដែលមានទីតាំងនៅក្នុងផ្សារទំនើប Aeon mall កាលពីថ្ងៃទី៦ ខែសីហា ឆ្នាំ២០១៤។
លោក ទេព រិន្ទដារ៉ូ ដែលបានចាប់ដៃគូដើរបង្ហាញរាងនៅលើកំរាលព្រំពណ៌ក្រហមឆ្អិនឆ្អៅជាមួយអ្នកនាង ចន ច័ន្ទលក្ខិណា នៅក្នុងពិធីខាងលើបានបង្ហាញនូវចំណាប់អារម្មណ៍ថា ការដាក់សម្ពោធរោងកុនថ្មីលំដាប់អន្តរជាតិ Major Cineplex នៅលើទឹកដីនៃប្រទេសកម្ពុជានាពេលនេះ បានឆ្លុះបញ្ចាំងអោយឃើញពីការវិវឌ្ឍន៍ថ្មីនៃវិស័យសិល្បៈភាពយន្តខ្មែរ។
លោករំពឹងទុកថា ភាពយន្តខ្មែរនិងមានសន្ទុះទៅមុខយ៉ាងឆាប់រហ័ស នៅពេលដែលភាពយន្តខ្មែរចេះតែបន្តផលិត ឡើងថ្មីៗជាបន្តបន្ទាប់ ហើយបណ្តាផលិតករ និងអ្នកដឹកនាំរឿងព្រមទាំងតារាសម្តែងនានាបានខិតខំរួមគ្នាធ្វើការ ផ្លាស់ប្តូរ និងចែករំលែកនូវបទពិសោធន៍គ្នាទៅវិញទៅមកដោយមិនរើសអើង។ ជាក់ស្តែងការរៀបចំអោយមានតារាជាច្រើន បានបង្ហាញខ្លួននៅលើកម្រាលព្រំនៅពេលនេះ ពិតជាលើកមុខមាត់តារាយើងដែលកន្លងមកតែងតែចង់បាននូវឱកាសនេះយូរមកហើយ។ លោកពិតជាមានក្តីរំភើបខ្លាំងណាស់ ដែលបានឃើញកូនខ្មែរបញ្ចេញនូវឆន្ទៈគាំទ្រតារាខ្មែរនៅពេលបង្ហាញខ្លួនដោយមិនរើសអើង នេះហើយជាសញ្ញានៃការវិវឌ្ឍន៍ថ្មីនៃវិស័យសិល្បៈខ្មែរ។
ស្រដៀងគ្នានេះដែរ លោក សុះ ម៉ាច ក៏បានសម្តែងនូវក្តីសង្ឃឹមយ៉ាងមុតមាំថា តទៅថ្ងៃមុខវិស័យភាពយន្តខ្មែរនឹងមានការរីកចំរើនឈានទៅមុខ និងបានបង្ហាញវត្តមានភាពយន្តរបស់ខ្មែរលើបណ្តាប្រទេសផ្សេងៗជាក់ជាមិនខាន ព្រោះយើងមានរោងភាពយន្តទំនើបលំដាប់អន្តរជាតិបង្ហាញវត្តមានជាបន្តបន្ទាប់ ហើយការវិនិយោគលើវិស័យនេះ ក៏កំពុងតែមានសកម្មភាពផុសផុលផងដែរ។
សូមបញ្ជាក់ថា Major Cineplex គឺជារោងភាពយន្តលំដាប់អន្តរជាតិចុងក្រោយគេ ដែលបានដាក់សម្ពោធជាផ្លូវការដោយមានការចូលរួមពីសំណាក់ពាណិជ្ជករ ផលិតករ អ្នកដឹកនាំរឿង សិល្បករសិល្បការិនីប្រមាណជាង ៧០០ នាក់ ខណៈរោងភាពយន្តទំនើបផ្សេងៗទៀតបានដាក់សម្ពោធ និងកំពុងតែដំណើរការទាក់ទាញទស្សនិកជនជាច្រើន៕